فاكر اول مرة / كان العالم خال جدا صامت جدا وكأنه يحترم لحظاتي المقدسة / وانا احترمك قدر مايحترمني العالم بأكمله / كنت ببص علينا من عينين ربنا الواسعين/ وفينوس قالتلي سر/ انا خايفة جدا ياتري المستقبل هيبقي عامل ازاي / ويابلدنا ياللي بحبك انا خاي...فة خايفة منك / نفسي حد يمسك راسي بقوة تطرد منها الاشباح ويحبسهم في صندوق حديد بقفل جامد اوي ويحطها علي صدره ويغنيلي نامي نامي ياصغيرة يالا اغفي عالحصيرة ... محمود ممكن في يوم من الايام تبقي تعمل كدة / متي تتمرد الملائكة وتنصت الآلهة / سالي زهران انت ملاك بس بطلي تجيلي في الحلم / عارفة قبل التنحي بيوم حلمت اني استشهدت وحطوا صورتي عالقصر الجمهوري وأول امبارح حلمت بعمرو عيسي قاعد بيرسم عالحيطان في السجن/ انا خايفة ويأسانة وبقت اسهل حاجة عندي اني ابكي / نفسي ارجع عندي ست سنين واروح المدرسة لاول يوم واقعد الفت نظرك يا ابلة ليلي علشان تسأليني اصعب سؤال وتديلي نجمة / انا بحب النجوم والسبب ابلة ليلي / وبحب التمرد والسبب بابا / وبحب الصراحة بسببك ياماما / وانت ياحنان بتحبي ايه بسببك ها ايه / انا شبه صاحبة بابا / ماما انت اتجوزتي بابا ليه علشان نخلفك طيب انا مش شبهك ليه علشان لقيناكي علي باب جامع صعبتي علينا قلنا نربيكي طيب مين اللي حطني علي باب الجامع حنان اطلعي من نافوخي الساعة دي بأسئلتك طيب هاتي جزرة وانا امشي / ياعزيزي كلنا لقطاء / أنت دوما تشبه أحدا في ذاكرة أحد فيتعامل معك علي هذا النحو دون ان يقصد فيتسبب في ايلامك وكرهه / قلبي موجوع وبيبكي جوايا بصوت عالي ومقسوم واشمعني هو يعني ميتقسمش/ سيدي ها أنا ذا ثائرة ملامحي قديمة وخالصة وتفاصيل تنشد الحرية والخلاص / بحب الليل اكتر/ ايوة ياماما انا اخلاقي اخلاق خفافيش خلاص / انا خفاش بيحب الشمس بحرارتها / نفسي اخرج الساعة 2 بالليل وادور علي شارع فاضي وافضل اصرخ فيه لحد لما اقع وايدين ربنا تطبطب علي قلبي بحنية فتمسح عنه البكا والحزن / انت يامن تعرف انك الهي وصلاتي وتمنحني القدرة علي البقاء كن بداخلي لاطمئن فلن اخبر احدا بمدي خوفي سوي قلبك وذراعيك .
توقيع : حنان
ليست هناك تعليقات:
إرسال تعليق